Esta exposición de cantantes líricas recolle intérpretes de distintas tesituras. Enténdese por tesitura a altura propia de cada voz -feminina e tamén masculina-, que pode ser máis aguda ou máis grave, segundo corresponda. As principais tesituras femininas, de agudo a grave son: soprano, mezzosoprano e contralto. E as principais tesituras masculinas, tamén de agudo a grave, son: contratenor, tenor, barítono e baixo.

Cantantes como Ofelia Nieto, María Luisa Nache ou Ángeles Ottein, son sopranos ou tiples: é o tipo de voz feminina máis aguda. O termo provén do italiano soprano que significa "superior" ou "soberano" e, este, á súa vez, provén do latín súper, supra, que significa "sobre" ou "por encima de". Habitualmente leva a melodía principal. E a súa extensión abrangue desde o do4 ata o do6. Xeralmente representan papeis operísticos e zarzuelísticos de mulleres xoves, inocentes e boas (véxase, Susana, en As bodas de Fígaro de Mozart).

 

Inés Rivadeneira e Matilde Vázquez pódense considerar mezzosopranos, polos roles operísticos interpretados.

Mezzosoprano é a voz feminina media, situada entre as sopranos e as contraltos. O termo provén do italiano, mezzosoprano, que significa "medio-soprano" ou "casi-soprano". A súa extensión abrangue desde o la3 ao fa5. Habitualmente representan papeis operísticos e zarzuelísticos de mulleres máis maduras que simbolizan a voz da experiencia e da adultez ou mulleres duras que rompen os canons habituais (véxase, a protagonista Carmen, en Carmen de Bizet).

 

Polas críticas de prensa histórica, sabemos que as voces de Enriqueta Brandón e Rosario Salgado Pereira eran consideradas de contralto.  Contralto é a voz feminina máis grave. É un tipo de voz moi difícil de atopar pois só o 2% da poboación feminina é contralto de forma natural. É por isto que habitualmente os papeis de contraltos son interpretados por mezzosopranos que teñan un rico rexistro baixo. A extensión das contraltos abrangue do fa3 ao fa5: . Hai papeis de contralto moi famosos (véxase, Rosina, en O barbero de Sevilla de Rossini), pero son poucas as óperas escritas para papel protagonista de contralto.

 

Agora que sabes o que é a tesitura e as diferencias entre soprano, mezzosoprano e contralto, invitámoste a escoitar os nosos “retratos cantantes”. Están feitos con https://www.hedra.com/, unha tecnoloxía IA que permite asociar interpretacións históricas a retratos históricos, de tal xeito que emulan como cantarían as nosas cantantes líricas protagonistas.